====================
အခန်း(၇)
ဖိုးထောင် နှစ်ရက်လောက် ဗမာမ အပျိုကြီးဈေးဆိုင်နား မရောက်တာနဲ့ ဒီနေ့ ကြံတင်ပြီးပြန်လာတော့ ဝင်လိုက်တယ်ဆိုပါတော့။
"အလို ကိုဖိုးထောင် ဘယ်ကနေမျက်စိလည်လာတာလဲ ပျောက်ချက်သားကောင်းနေလိုက်တာ ဒါနဲ့ ဟိုနေ့က အလိမ်ခံရတယ်ဆို"
"မသိသေးတော့လည်း ခံရအုံးမှာပေါ့ အစ်မရယ်"
" ငါးသိန်းတောင်ဆို "
" မဟုတ်ပါဘူးဗျာ့ သုံးသိန်းခွဲထဲပါ"
" မသိဘူးလေ ငါးသိန်းလို့ကြားလို့ စိတ်မကောင်းပါဘူး ကိုဖိုးထောင်ရယ် လူတွေများလုပ်ရက်လိုက်တာနော်"
"အော် သူတို့ အလုပ်နဲ့ သူတို့လုပ်တာဘဲ သူတို့ ပစ်မှတ်ထဲ ကိုယ်ဝင်သွားတော့လည်းပေးလိုက်ပေါ့ ဒါဘဲရှိတာ"
"အေးလေ ကိုဖိုးထောင်ကတော့ ယောက်ျားဆိုတော့ အဲလိုသဘောထားလို့ရတာပေါ့ အမေ ဒေါ်နန္ဒာ ကျတော့ ဘယ်လိုသဘောထားရမလဲ တွေးပူမိတာပါ ကိုဖိုးထောင်ရယ်"
" ဟိုနေ့က ဘဲ ဟိုဘက်ရွာက ဘုန်းကြီး တရားဟောလိုက်လို့ အမေလည်း ပုံမှန်ဖြစ်နေပါပြီဗျာ ပူမနေပါနဲ့ ဟိုဘုန်းကြီးက သူလည်းအလိမ်ခံရတဲ့ အထဲ ပါသေးတော့ အားမငယ်ဖို့ပြောဟောလိုက်တာများ ပါရမီသာရင့်ရင် ကျွတ်တမ်းတောင်ဝင်သွားမလားဘဲ"
" နေပါအုံး ကိုဖိုးထောင်ရယ် ဖြေးဖြေးပေါ့ ကြွေးလေးတော့ဆပ် သွားပါအုံးလား "
" ဗျာ ဘယ်ကကြွေးလဲဗျာ့ "
"ဟို ဟိုလေ ဟိုနေ့က အလိမ်ခံရတဲ့ ပိတ်ဆံက သူများနားချေးထားတယ်ဆို"
" သူငယ်ချင်းနားကယူထားတာပါဗျာ နှစ်သိန်းကပြန်ပေးပြီးပါပြီ သုံးသိန်းကျန်တာပါ "
"သုံးသိန်းလည်းအတိုးနဲ့ဆို ကြာရင်များလာမှာ ကိုဖိုးထောင်ရဲ့"
"ဘာ အတိုးမှ ပေးစရာမလိုဘူး အရင်းတောင် မပေးဘဲနေလို့ရတဲ့ အနေအထားရှိတယ် ဒါပေမဲ့ မပေးလို့ဘယ်ရမလဲ သူကတော့ မပေးလည်းရပါတယ်လို့တောင်ပြောထားတာဗျာ့ ဘာလို့လဲသိလား"
" ဘယ်သိမလဲ ကိုဖိုးထောင်တို့ကိစ္စကို "
"ဖိုးထောင် ကို သူ ပိတ်ဆံချေးပေးလာတာ သူ့မိန်းမ မသိဘူးတဲ့ အဲဒီပိတ်ဆံရှိမှန်းလည်းသူ့မိန်းမမသိဘူးတဲ့ဗျာ"
"ရှင်တို့ သူငယ်ချင်းတွေက အဲလောက်တောင်ခင်ကြတာကိုး "ဆိုတာနဲ့
ဖိုးထောင်တို့ ခင်မင်ရင်းနှီးကြပုံလေးတောင် ပြေပြလိုက်သေးရဲ့ဗျာ။
ဒီလိုဗျာ့ ဒီကောင်က အတော်ရိုးတဲ့ကောင်လေ သူအိမ်ထောင်မကျခင်က လူပျိုလှည့်သွားရင် ဖိုးထောင်ကို လာ လာခေါ်တာ ဖိုးထောင်က အပြောကောင်းတာဆိုတော့ သူနဲ့စာရင် ဖိုးထောင်ကိုကောင်မလေးတွေက ပိုကြည်တာဗျာ့ အဟဲ ။ဒီကြားထဲ သူတို့နာရီပျက်သွားပြီဆိုရင်လည်း ဖိုးထောင်ကိုဘဲ အားကိုးရတာကိုးဗျာ့။ အဲဒါ သူနဲ့ရသွားတဲ့ ကောင်မလေး ဆိုရင် သူ့အိမ်များဖိုးထောင်တို့ နှစ်ယောက် ရောက်သွားလို့ကတော့ လာ လာ ကိုဖိုးထောင် အဲလိုကိုခေါ်တာ သူ့နာမည်နဲ့ တစ်ခါမှတောင် မခေါ်ဘူး။ သူကတော့ နောက်ဆုံး ဖိုးထောင်ကို အားကိုးရတာလေ အဲဒီကောင်မလေးကို သူချစ်နေတဲ့ အကြောင်း ဘယ်လိုလုပ်ရင်ကောင်းမလဲ ဆိုတာတွေပေါ့။
"စာပေးပေါ့ကွ " ပေါ့ ။ အဲဒီတုန်းက ခုလိုဖုန်းတွေက မပေါ်သေးတော့ စာပေးစာယူနဲ့ ချစ်ကြရတာလေဗျာ။စာကျတော့လည်း သူက မရေးတတ်ပြန်ဘူးတဲ့ဗျာ လုပ်ပါအုံးဆိုတာနဲ့ ဖိုးထောင်ဘဲရေး ပြီး သူ့ကိုယ်စား ဖိုးထောင်ဘဲပေး ပေးလိုက်ရတာဗျာ့။ ကောင်မလေးက ဖိုးထောင်ပေးတယ်မှတ်နေတာပေါ့။ နောက်တစ်နေ့တွေ့တော့မှ ကိုဖိုးထောင်ရဲ့ စာလည်းမဟုတ်ဘူးတဲ့ ။ ငါက လေပေါတာဘဲတတ်တာဟေ့ စာမှမရေးတတ်တာ ဘာညာနဲ့ ကိုယ်အသုံးမကျကြောင်း ဒီကောင်ဘယ်လောက်တော်ကြောင်း လိမ့်ပြောရတာပေါ့ ။ ကားပွဲစားတွေပြောသလို သူတို့ဆီကရောင်းမယ့် ကားများဆိုရင် ဂျပန်က ကားတွေတွေတောင် ထိုင်ငိုရမလိုမျိုးပေါ့။မသေမချင်းမှတ်ထား လူပြော မလုပ် လူလုပ်မပြောတဲ့ ဘာညာနဲ့ ပြောရတာပေါ့။ ဒီလိုနဲ့ နောက်တော့ ဒီကောင်နဲ့ အဆင်ပြေသွားတယ်ဗျာ့။ တစ်နှစ်လောက်ကျတော့ မင်္ဂလာဆောင်တယ် ဆိုပါတော့ဗျာ။ ကလေးတစ်ယောက်လောက်ရတော့မှ ကိုဖိုးထောင်တဲ့ ကိုဖိုးထောင်ရေးထားတဲ့စာတွေ အရမ်းဖတ်လို့ကောင်းတာတဲ့ ကျမတောင် ဖတ်လို့ကောင်းလို့ဆိုပြီးသိမ်းထားတာ မနေ့ တစ်နေ့ကမှ သူ့ ယောက်ျား အိမ်ထဲရှင်းရင်း မီးရှို့တဲအထဲ ပါသွားတာ နှမြောလိုက်တာ တဲ့ဗျာ။
ဖိုးထောင်လည်း ခပ်တည်တည်ဘဲ အဲဒါ ငါ့စာတွေမှ မဟုတ်တာဟာ ပေါ့
သိပါတယ် ကိုဖိုးထောင်ရယ် ခုချိန်ထိ သတ်ပုံတောင်မှန်အောင် မရေးနိုင်တဲ့ သူက ဘယ်လိုလုပ် သူ့စာလို့ပြောလို့ရမှာလဲတဲ့ဗျာ။
နင်ကလည်း ဒီအချိန် ဒါတွေ ဘာလုပ်ဖို့ လာပြောနေတာလဲ ထားလိုက်စမ်းပါပေါ့
စာတွေ နှမြောလို့ နှမြှောကြောင်းပြောတာပါ ဘာမှမဟုတ်ပါဘူး ဘာစိတ်ကူးမှလည်းမရှိပါဘူး တဲ့လေ။
ဒီအကြောင်းတွေ နားထောင်ရင်း အပျိုကြီးကတော့ ဒီလိုမှတ်ချက်ပေးတယ်ဗျာ့။
"ကိုဖိုးထောင် ဟာကလည်း ဖောင်စီးရေငတ် လက်သမား အိမ်ကောင်းမနေရ ဆိုသလိုဖြစ်နေပြီ " ဆိုပါလားဗျာ။
အဲသလို လေပေါရင်း လက်ဘက်ရည်သောက်ရင်းနဲ့ ည ၈ နာရီလောက်ကျတော့ သကြားစက်ဆီကို ကြံကားနဲ့ လိုက်သွားတယ် ဆိုပါတော့ဗျာ။ ညစာ အိမ်ပြန်စားချိန်မရှိတော့တာနဲ့ အပျိုကြီးဆိုင်မှာဘဲ ဗမာချက် ငပိရည်နဲ့ စားသွားလိုက်တယ်ဗျာ။ စားပြီးတော့ နွားနို့တစ်ခွက်တောင် တိုက်လိုက်သေး ။ လူပျိုကြီးဖိုးထောင်ကလည်း လူပျိုကြီးပီပီ တွေးမိလိုက်ပုံက တလွဲ
" နွား နို့တောင် ဒါလောက် ကောင်းနေမှတော့ ......" ဟူသတတ်။
ဆက်ပါဦးမည်။
No comments:
Post a Comment